وأنا قاعد في الجامعة في أيّام الدراسة... رن الموبايل وكانت واحدة من الأصحاب... ولقيت البنت مُنهارة ومش طايقة عيشتها وعايزة تقتل أيَّ حد يمُر من قدّامها... طبعاً قعدت أهدّي فيها وأقول لها الحياة بسيطة وكلام من ده... وعزمت عليها تيجي الجامعة وتسيبها من النكد ده... علىَ الأقل السِلَّة هاتخلِّيها تروَّق شويَّة.... قالت لي خمس دقايق وأكون عندك... مسافِة السِكَّة...
المُهم بعد حوالي نُص ساعة جات... وقعدت جنبنا بدون ولا كِلمة... وأفراد الشِلة يحاولوا ينكشوا فيها وهيَّ ولا هنا... طلبت لها عصير ليمون شربتُه وبرضُه من غير ولا كِلمة... قولت لها مالِك يا بنتي؟ قالت لي... البحث إللي طالبُه الدكتور فيه شغل كتير لسَّة ماعملتوش هاسهر عليه للصُبح... بس مش عارفة أعمل إيه... وبعدها سرحِت بخيالها كدة شويَّة وقالِت لي: تخيَّل لو الدُنيا دي ويندوز XP .. وطبعاً قولت في سِرِّي بَس.. دي وصلت والحالة إتدهورت جداً.. البنت إتجنِّنت خلاص... وفضِلت أطاوِعها لمّا أشوف آخرتها إيه... وكمِّلِت كلامها وقالِت... تخيَّل لو الدُنيا دي ويندوز XP... مثلا لو فيه أزمة مرور و الدنيا زحمة نحدِّد كُل العربيّات Ctrl+A وبعدها أعمل لهُم Delete وهبقىَ لوحدي في الشارع... ودايماً أعمِل لحياتي Refresh وأرجع في أخطائي Ctrl+Z وللماضي Clear History .. ولو حسّيت إني مش مُتأقلمة مع الحياة أعمل Format ودايماً أفتح صفحة جديدة في حياتي New Folder ولو ضاع مِني أيّ حاجة بمُنتهىَ البساطة أعمل Search و لو حسّيت بالبرد أخد حبة Anti Virus.. وكُل ما أحِس إن رتم الحياة بطيء أعمل Restart .. و لو حسِّيت إني تٌهت في الدُنيا أخلّي الصورة واضحة Win+Dودايماً أعمل جولة داخل نفسي Alt + Esc و أقفل أي صفحة مش عاجباني Alt+F4 .. و أيّ عقبة تواجهني مش هَيأس وأدّيها Alt+Ctrl+Delete ..ولو عملت أي حاجة و ندمت عليها أعمل Restore ..
طبعاً أنا لو الحياة كِدَة علىَ طول هاعمِل setup .. طيَّب وأنتم .. تخيَّلوا كده الجنان دَه ..
